Саяси қуғын-сүргін және аштық құрбандарын еске алу күнінде Қазақстан Республикасының Мемлекеттік хатшысы, Саяси қуғын-сүргін құрбандарын толық ақтау жөніндегі мемлекеттік комиссияның төрағасы Қырымбек Көшербаев мемлекеттік комиссия мүшелерімен бірге «АЛЖИР» музей-мемориалдық кешенінің мемориалдық қабырғасына гүл қойды. Еске алу рәсіміне қатысушылар саяси қуғын-сүргін және ашаршылық құрбандарын бір минут үнсіздікпен еске алды,- деп хабарлайды Ақорда сайты.

Шараға Премьер-Министрдің орынбасары Ералы Тоғжанов, Президент Әкімшілігі Басшысының бірінші орынбасары Дәурен Абаев, «Нұр Отан» партиясы Төрағасының бірінші орынбасары Бауыржан Байбек, Ақмола облысының әкімі Ермек Маржықпаев қатысты.

          Музей-мемориалдық кешенін аралау барысында Қырымбек Көшербаев музейдің ғылыми-зерттеу және экспедициялық жұмыстарына ерекше назар аударып, мемлекеттік комиссия жұмыс тобының бір міндеті Республика аумағындағы атышулы АЛЖИР лагерінің лагерьлерде болған жазықсыз қуғын-сүргінге ұшыраған тұтқын болған адамдарды, сондай-ақ олардың отбасы мүшелерін ақтау екенін атап өтті.

Белгілі болғандай, Мемлекет басшысы Қасым-Жомарт Тоқаевтың бастамасымен құрылған мемлекеттік комиссияның негізгі қызметі тарихты зерделеу және мұрағаттық зерттеулер жүргізу.Мемлекеттік комиссияның қызметін ұйымдастыру шеңберінде жобалық кеңсе, екі шағын комиссия, 11 жұмыс тобы және 17 өңірлік комиссия құрылды және олар жұмыс істеуде.

Жұмыс топтары мен аймақтық комиссиялардың ғалымдары мен сарапшылары жабық мұрағат материалдарына қол жеткізіп, зерттеу жұмыстарын лагерьлерде болған жазықсыз қуғын-сүргінге ұшыраған адамдарды, сондай-ақ олардың отбасы мүшелерін ақтаудан бастады. Оның тиімділігін қамтамасыз ету үшін негізгі әдістеме бекітілді, жұмыс топтарының тақырыптық жоспарлары құрылды, мұрағат құжаттарын орнында іздестіру және зерделеу бойынша кеңестер өткізілуде.

Соңында Мемлекеттік хатшы мемлекеттік комиссияның қызметі, ең алдымен, саяси қуғын-сүргін мен ашаршылықтың жазықсыз құрбандарын мәңгі есте қалдыру, тарихи құндылықтарды қалпына келтіру жөніндегі алдыңғы және болашақ ұрпақ алдындағы орасан зор тарихи миссия және жауапкершілік екенін тағы да еске салды.

Дереккөз: Қырымбек Көшербаев саяси қуғын-сүргін және ашаршылық құрбандарын еске алды -