Мемлекеттік кеңесші Ерлан Қарин саяси қуғын-сүргін құрбандарын толық ақтау жөніндегі мемлекеттік комиссияның кезекті отырысын өткізді-, деп хабарлайды El.kz Ақордаға сілтеме жасап.

Отырыста Мемлекеттік комиссияның ғылыми-зерттеу, баспа және архив жұмыстарының барысы қаралып, іс-шара барысында саяси қуғын-сүргін тарихына арналған материалдар мен құжаттар жинағының кезекті блогын 2023 жылы басып шығару жоспарлары туралы шолу жасалды.

Ғалымдар мен сарапшылар ХХ ғасырдың 20-50 жылдарындағы саяси қуғын-сүргін тақырыбына қатысты материалдарды терең зерттеп, талдауға бағытталған ғылыми жобалардың нәтижелерін де ортаға салды.

Сонымен қатар, кеңесте ғалымдар мен зерттеушілерді ғылыми-зерттеу жұмыстарын ұйымдастыруға қолдау көрсету мақсатында жүзеге асырылып жатқан мақсатты қаржыландыру бағдарламасының орындалу барысы қаралды.

Отырыс қорытындысы бойынша Мемлекеттік комиссияның баспа қызметін дамыту, ғылыми-зерттеу жұмыстарын жалғастыру, архив базасын жүйелеу және қаржыландыру жөніндегі негізгі міндеттерін іске асыруға бағытталған тапсырмалар берілді.

Ақпарат көзі: Ерлан Қариннің төрағалығымен саяси қуғын-сүргін құрбандарын толық ақтау жөніндегі комиссия отырысы өтті.