2022 жылғы 22 қыркүйекте А.Байтұрсынов атындағы Қостанай өңірлік университетінде Қостанай облысы әкімдігінің қоғамдық даму басқармасының ұйымдастыруымен «Саяси қуғын-сүргін құрбандарын ақтау бойынша ғылыми-зерттеу жұмыстарын ұйымдастырудың өзекті мәселелері» атты республикалық семинар өтті. Іс-шараға Әл-Фараби атындағы ҚазҰУ, О.Байқоңыров атындағы Жезқазған университеті, Х.Досмұхамедов атындағы Атырау университеті, Ш.Уәлиханов атындағы Көкшетау университетінің тарихшы ғалымдары қатысты.
2021 жылдың қаңтарында Саяси қуғын-сүргін құрбандарын толық ақтау жөніндегі Қостанай облыстық комиссиясы өз жұмысын бастады. Комиссия мүшелері саяси қуғын-сүргін құрбандарын құқықтық және саяси ақтау, Қазақстанның жазықсыз құрбан болған зиялы қауым өкілдері үшін тарихи әділеттілікті қалпына келтіру біздің басты міндеті деп біледі. Өткен жылы қостанайлық тарихшылар байлардың, болыстардың мүлкін тәркілеу, 1929 жылғы Батпаққара көтерілісі және жер аударылған халықтар туралы монография жариялаған болатын. Сондай-ақ, Қазақстанның мемлекеттік және арнайы мұрағаттарында жұмыс істеп, саяси қуғын-сүргін құрбандары туралы тың құжаттарды тауып, саяси қуғын-сүргін құрбандарының жаппай жерленген бейіттерінің виртуалды картасын кеңейтіп, заңсыз қудаланған азаматтар туралы мәліметтер базасын қалыптастыруға қомақты үлес қосуда.
Семинарға қатысушылар аталмыш тақырыптарға баяндамалар оқып, өзара пікір алмасып, Қазақстандағы саяси қуғын-сүргін құрбандарын ақтау мәселелерін зерттеу бойынша ғылыми-зерттеу қызметін жүзеге асырудың жаңа перспективалық бағыттарын белгіледі.
