Аталарымыздың қонысы Ақтөбе облысы Ойыл ауданы Құрман кеңшары Ақсай, Сүрелі маңында болған. Кәрі атамыз Қожан діни сауатты адам болған екен. Мешіт ұстаған, қажылыққа барып келген. Балалары – Қайырғали, Сағатқали. Қайырғали бай-бақуатты болған. Сағатқали атамыз Санкт-Петербургте білім алған. Қайырғали атам 1929-1931 жж. қуғын-сүргінге ұшырап, дүние-мүлкі тәркіленіп, Орынбор облысына жер аударылған. 1930 жылдан кейін Гурьев облысына семьясымен келген. Доссор кентінде інісі Сағатқали оқуын бітіріп келіп, Сбербанкте жұмыс жасап жүргенде, ауырып мезгілсіз қайтыс болған. Отбасын құрмаған. Ал үлкен атам Қожан белгісіз, қайда жоқ болғаны?! Әлде Совет өкіметі ұстап алып кетті ме? Ешқандай дерек жоқ. 1930 жылы Қайырғали дүние салған. Баласы Сәлім (1925 жылы туған) 5 жасында жетім қалған. Жетім қалған бала не білсін? Әйтеуір, ел арасынан еміс-еміс еститінбіз, аталарымыздың бай-бақуатты, беделді, құрметті кісілер болғандарын. Әкем Сәлім Қайырғалиұлы 2001 жылы дүниеден өтті. Аталарымның қайғылы тағдыры туралы бар білетінім осы. Кітап бетінде қалсын деп жазып беріп отырғаным. Мәлімет берген: Серікқали Сәлімұлы. Ақтөбе қаласы, 2023 жыл