Елімізде саяси қуғын-сүргін құрбандарын толық ақтау жөніндегі мемлекеттік комиссияның төрағасы Е.Т.Кариннің 2023 жылғы 18 қаңтардағы хаттамалық тапсырмасын орындау мақсатында қуғын-сүргінге ұшыраған адамдардың ұрпақтарынан естелік әңгімелермен мәліметтерді, құжаттар мен фотоларды жинақтау бойынша тиісті жұмыстар жүргізіліп жатыр. Осы мақсатта Қазығұрт ауданына саяси қуғын-сүргін құрбандарын толық ақтау мәселелері жөніндегі Түркістан өңірлік комиссия жанынан құрылған жұмысшы топ мүшелері арнайы келіп жиын өткізді. Жиынға аудан әкімінің орынбасары С.Тұрсынқұлов, аудандық ардагерлер кеңесінің төрағасы А.Омаров және кеңес мүшелері, аудандық «Әжелер алқасы» мүшелері және бірқатар аудан активі қатысты.
Атаулы жұмысшы топтың құрамында Түркістан облысы қоғамдық даму басқармасы, «Қоғамдық келісім» КММ-нің бөлім басшысы - Аширбаев Бахытжан Шәкірұлы, Қ.А.Ясауи университетінің доценті – Оразбай Сержан Қарсыбайұлы, тарихшы, ағылшын маманы, Қ.А.Ясауи университетінің оқытушысы – Оразхан Нұрлан сынды азаматтар бар.
Кездесудің күн тәртібінде «Саяси қуғын-сүргін құрбандарын толық ақтау мәселелері жөніндегі Өңірлік комиссия жанынан құрылған жұмысшы топтың экспедициясы» қаралды. Күн тәртібіндегі мәселе бойынша комиссия мүшелері жан-жақты баяндамалар жасап, қатысушылар тарапынан қойылған сұрақтарға жауап берді.

Қазығұрт ауданы әкімдігінің баспасөз қызметі