2023 жылғы 18 мамырда Қарағанды облысының саяси қуғын-сүргін құрбандарын толық ақтау жөніндегі Өңірлік комиссия мүшелері, сондай-ақ саяси қуғын-сүргін құрбандарын зерттеуші ғалымдар тобы, атап айтқанда Е.А. Бөкетов атындағы Қарағанды университеті тарих факультетінің деканы Ж.А. Жұмабеков, «Bolashaq» Академиясының жалпы білім беретін пәндер кафедрасының меңгерушісі А.У. Ильясова, Е.А. Бөкетов атындағы Қарағанды университетінің аға оқытушылары Т.К. Сакабай, Ә.Б. Жағыпар, Жобалық кеңсе жетекшісі С.А. Қасымовтың жетекшілігімен 1920-1950 жж. Қарқаралы қаласындағы Қарқаралы аудандық архиві қорларын қарастырды.

 Қарқаралы аудандық архивінің директоры М.Ә. Кәрім, жоғары санатты архивист Г.Қ. Асауова, архивтің бұрынғы директоры С.Қ. Оспанов зерттеу жұмыстарына қатысып көмектесті.

Комиссия мүшелері байлар мен кулактардың  мал-мүлкін тәркілеуге қатысты ауылдық округтардың, аудандық атқару комитетінің шешімдерін; халық көтерілістері мен қарсылықтарын басып-жаншу бойынша бұрын-соңды зерделенбеген және ғылыми айналымға енбеген құжаттарды, әсіресе  Боқты қарулы көтерілісін аяушылықсыз басуға қатысты тың материалдарды мұқият зерделеумен айналысты.