2023 жылғы 8 маусымда Саяси қуғын-сүргін құрбандарын толық ақтау жөніндегі мемлекеттік комиссияның Жобалық кеңсе басшысы Сабыр Қасымов бір топ республикалық және өңірлік жұмыс тобы мүшелерімен бірге Астана қаласының мемлекеттік архивінің қорларымен танысты.
   Жұмыс тобын қарсы алған Астана қ. мемлекеттік архивінің директоры Берік Жолмұханұлы Туребеков істеріне сәттілік тілеп, қолайлы жағдай жасады. Жұмыс тобы астаналық архив қорының ХХ ғ. 20-30 жылдарындағы Ақмола губерниясы және округінің мемлекеттік билік органдары, ішкі істер, сот және прокуратура мекемелерінің құжаттарымен танысты. Кеңестік биліктің алғашқы жылдарында негізсіз қылмыстық іске тартылып, Ақмола түрмесіне болғандардың жеке істеріне қызығушылық танытты.
   Жұмыс барысында саяси науқандардың, соның ішінде тәркілеу саясатының 1923-1924 жылдардан басталғаны белгілі болды. Сол кезеңдегі әкімшілік-аумақтық бөлініске байланысты Ақмола округіне қарасты қазіргі Қарағанды, Жезқазған, Көкшетау облыстарындағы саяси оқиғалар туралы құжаттар сақталған. Ізденіс-зерттеу жұмыстары жалғасуда.